Seniëur Matthias fova n descendënt di Jenner de Tluses, na familia scialdi stimeda y dal muet. Tl 1677 fovel deventà pluan de Tluses. Do i lëures de costruzion per garantì la segurëza di vijitadëures tla dlieja dla Santa Crëusc ova Matthias Jenner tl 1680 metù man de fé su inò l cunvënt. Che l ulova fundé n orden sun Jevun, tenivel ntant mo sucrët.
Pervia de si bon cuntac cun l cunvënt Nonnberg a Salzburg, ti ova la badëssa de chël cunvënt mpermetù de ti mandé la prima munighes sun Jevun.
Ai 27 de fauré dl 1685 fovela pona stata tan inant. Cin munighes dl cunvënt benedetin de Salzburg jiva per l prim iede su per troi sun l crëp de Jevun.

Plu o manco 500 munighes, de chëstes 11 badësses, à te passa 300 ani, dal 1685 nchina tl 2021, vivù sun Jevun. L’ultima badëssa dal 1996 nchina tl 2021 fova l’oma venerabla Ancilla Hohenegger de Langtaufers tla Val Venuesta.

La dezijion de la dé su y de se n jì dal cunvënt ie unida tëuta tl 2021. Pervia che l ne zapova plu ite deguna munighes jëunes, ne fovel nia plu mesun mené inant la cumenanza dl orden sciche l toca.
Una dla munighes, Sor Magdalena Told, ie jita ite tla storia dl Tirol. Ntan la ocupazion bavareja dl Tirol, dal 1805 nchina tl 1809, ovela cun si ardimënt salvà l cunvënt da de majera scascinedes y desdruzion.
Ai 25 d’agost dl 1808 ova l guviern bavaresc cumandà de stlù l cunvënt de Jevun.
Per no dé tl uedl se ova Sor Magdalena n sucrët trat sëura na mondur da saudé y se n fova muceda ora de cunvënt. De nuet fovela jita da Villanders sëura l Renon ora y ju fin a Bulsan. Iló se ovela prejentà pra l cumandant dla trupes bavarejes. La ti ova cuntà dla rubaries y dla strambaries suzedudes sun Jevun y la ti ova prià bel de cherdé de reviers si saudeies. Y l cumandant ti ova fat al sënn.